Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Donostiako Euskararen Patronatuak 5.000 liburuxka banatuko ditu saltegietan euskara errazago erabil dezaten idazkietan


2006-01-25 11:21



DONOSTIA, 25 (EUROPA PRESS)

Donostiako 5.000 saltegitan liburu bana jasoko dute merkatariek eguneroko lanean erabiltzen dituzten idazkiak txukun eta euskaraz egin ahal izateko. Liburua Donostiako Euskararen Udal Patronatuak prestatu du eta Lanerako Idazkiak izenburua eramango du.

Erabili.com webgunearen esanetan, liburuxka hau Gipuzkoako Merkatarien Elkartearekin, Zaharrean, Centro Erdi, Auzoa eta Dendass merkatari elkarteekin eta Gipuzkoako Ostalaritzako Enpresarien Elkartearekin lankidetzan kaleratua izan da.

Donostiako merkatari guztiei banatuko zaien argitalpen honek, tresna baliagarria izan nahi du euskara normaltasunez eta gero eta maiztasun handiagoz erabiltzeko ahalegina egiten ari diren merkatari eta ostalari donostiarrentzat.

Merkatariek hamaika ohar, informazio eta errotulu jarri behar izaten dituzte euren saltokietan bezeroak informatzeko, baita zenbait testu idatzi edota inprimakiak egunero bete ere. Lan horretan lagundu nahi du argitalpenak, merkatariari euskara lan esparruan erabiltzeko bidea erraztu nahi zaio argitalpenarekin zenbait aholku, ohar eta eredu eskainiz.

Lanerako Idazkiak argitalpenak merkatari eta ostalari oro hartu du kontuan. Euskara ezagutzen ez duenak, euskara gutxi menderatzen duenak edota alfabetatu gabe dagoen euskaldunak informazio baliagarria eta lagungarria aurkituko du bertan, baina baita euskara dakienak eta euskaraz idazten ohituta dagoenak ere.

Guztiei zuzenduta dago liburuxka, eta guztientzat erabilgarria izan nahi du. Horregatik dago bi eletan idatzita, argibideak euskaraz zein gaztelaniaz daude eta edonork ulertzeko moduan eratu da.

HIRU ATALETAN BANATUTA

Liburuxkak 54 orrialde eta hiru atal nagusi ditu. Lehenengoan eduki orokorrak jaso dira: establezimendu mota desberdinak jasotzen dituen hiztegi bat dago, zenbait laburdura erabilgarri, helbideak euskaraz idazteko informazioa eta Donostiako kale-izendegia, zenbakiak, ordutegiak eta datak zuzen idazteko arauak eta adibideak, edota merkatariek euren establezimenduetan jarri ohi dituzten ohar eta errotulu erabilienen zerrenda.

Bigarren zatian, lanerako idazki ereduak aurki daitezke: gutun komertzialak idazteko aholkuak ematen dira eta zenbait eredu ere jasotzen dira: udal inprimakiak, egiaztagiriak, bilera-deiak, erreklamazioak, fakturak, nominak, kontratuak eta abar.

Azken zatian, inprentetarako zenbait eredu biltzen dira: gonbitak, zorion-agurrak, oroigarriak. Liburuxka bi eletan idatzita dago, argibideak euskaraz zein gaztelaniaz daude, eta Donostiako merkatari eta ostalari guztien artean banatuko da, 5.000 ale guztira.

Argitalpenaz gainera, Donostiako Euskararen Udal Patronatuaren www.euskaraz.net web gunean izango da eskura. Era berean, Azpeitiako Euskara Patronatuaren www.erabili.com helbidean ere eskuragarri dago liburua.


212 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin