Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Bilboko Udalak kirola erabili du metaforatzat urte osoan egingo diren kultur jardueren berri emateko


2009-01-22 11:56

BILBO, 22 (EUROPA PRESS)

Bilboko Udaleko Kultura eta Hezkuntza Sailak kirola erabili du metaforatzat 2009. urteko kultur programazioa aurkezteko. Azken urteetan egin duen bezalaxe, datozen 12 hilabeteetarako antolatu dituen jarduera nagusiak laburbiltzen dituen programa argitaratu du Kultura eta Hezkuntza Sailak, aurten, Bodykultur, praktika ezazu! goiburuarekin.

Programaren 15.000 ale argitaratu dira euskaraz eta gaztelaniaz, eta horiek guztiak doan banatuko dira barrutietako udaltegietan, udal informazio bulegoetan, liburutegietan, elkarteetan eta gizarte, kultura eta hezkuntza alorreko beste ekipamendu batzuetan. Bilboko Udalak argitaratzen duen hileroko kultur agendarako harpidetuta daudenek ere doan jaso ahal izango dute etxean, posta bidez.

Programa kirol olinpikoaren logotipo ezagunen irudiaz aurkeztu da, zertxobait egokituta, atletismoa pinturarekin, arku-tiroa musikarekin edota gimnasia antzerkiarekin lotzeko asmoz. Honela, urte osorako kultur agenda honek buruari eragiteko, gorputza erlaxatzeko, sormena sasoian mantentzeko eta onena emateko gonbita luzatzen du.

ZAZPI ATAL

Kultur jarduerak zazpi atal nagusitan banatuta ageri dira. Arte eszenikoak sailean, Bilboko Kalealdia deritzon Kaleko Antzerki eta Arteen Jaialdia, haur-antzerki emanaldiak, Bilboko Antzerki eta Dantza Garaikidearen BAD Jaialdia, Nazioarteko Txotxongilo Jaialdia, Zirkuitoa antzerki programa, Antzerkiaren Nazioarteko Eguna edota BilbaoEszena antzerki-baliabideen udal zentroan egingo diren jarduerak daude.

Folklorea eta ondarea atalean, Bilbao Izan programako jardunaldiak, erakusketak eta bisita gidatuak bezalako jarduerak biltzen dira, baita kalean eta eskoletan eskainiko diren dantza tradizionaleko emanaldiak, Udaberriko Bertso Saioak jaialdia edota bilbainada lehiaketa ere.

Letrak suspertzea deritzon atalean, Bidebarrieta Kulturguneak antolatutako ekintzak, Unamuno, Otero, Aresti era Angela Figueraren omenezko jardunaldiak, Poesiaren Astea eta Nazioarteko Eguna, liburu azokak eta Udalak bultzatutako literatur lehiaketak jasotzen dira.

Ikus-entzunezkoak Zinebi eta Fant jaialdiak eta Zinebikluben programazioa barne hartzen ditu, eta Musika atalean, Musika-Música jaialdi klasikoa, musika erlijiosoko Bilbao Ars Sacrum jaialdia, Musikaren Europar Eguna, Abesbatzen Emanaldiak, Bilbao Distrito Jazz eta 365 Jazz Bilbao programa berria.

Arte bisualak sailari dagokionez, barrutietan gauzatutako ekimenak daude, hala nola, tailerrak, Expodistrito edo Distrito Foto. Azkenik, Ezagutzaren Gizartea atalak Bidebarrieta Zientifikoa, Zientziaren Astea edota Bilbao Arte eta Kultura topaketak biltzen ditu.

Kasu guztietan gertaera bakoitzaren data, egoitza edo auzoari buruzko informazioa ematen da. Horrekin batera, zortzi barrutietako kultur programazio espezifikoaren berri ematen da, bai eta udal liburutegi-sarean antolatutako beste ekimen batzuen berri ere, eta Kultura eta Hezkuntza Sailaren argitalpenei buruzko eta diru-laguntzetarako aurrekontu-atal eta ildoei buruzko argibide erabilgarriak ere ageri dira.

Kulturaren urteko programak Bilbon diharduten beste elkarte eta erakunde batzuei buruzko jakingarriak ere ematen ditu, BilbaoMusika, Arriaga Antzokia, Bilbao Arte eta Bilbao 700 III Millenium fundazioak edota hirian finkatuta dauden museoak tarteko direla.

Argitalpenak, kulturarekin zerikusia duten erakundeen helbide-zerrenda eskaintzen du, eta horrekin batera, jarduera desberdinei buruzko informazioa etxean doan jasotzeko eskabide-fitxa bat ere, Kultura 18 txartel berriari buruzko argibideak lortzeko aukera ematen duena; ekimen berri honi esker, adin nagusitasunera heltzen direnek hainbat kultur jarduerez doan gozatzeko aukera izango dute urtebetez.


140 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin