Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Bilboko Udalak aurreikusi du 5.300 bat lagunek eskatuko dituztela Gizarte Larrialdietarako Laguntzak


2009-01-30 17:24

Ia 11 milioi euro banatu ziren mota honetako laguntzetan 2008. urtean, aurrekoan baino %6 gehiago

BILBO, 30 (EUROPA PRESS)

Bilboko Udaleko Gizarte Ekintza Sailak aurretiko ziten sistema jarriko du abian otsailaren 6tik aurrera Gizarte Larrialdietarako Laguntzak artatzeko. Izapideak erraztu eta ilara luzeak saihesteko asmoarekin, Udalak lau bulego ezarri ditu aurretiko zitak eskatzeko. Pentsatzen da 5.300 bat lagun hurbilduko direla laguntza horiek eskatzera.

Santutxu/Begoñako Udal Zentroan (otsailaren 6tik 13ra), San Frantziskoko Udal Zentroan (otsailaren 16tik 27ra), Uribitarte pasealekuan (martxoaren 2tik 13ra) eta Garellanon (martxoaren 16tik 27ra eta martxoaren 30etik apirilaren 8ra) eskatu ahal izango dira zitak.

Bulego horietan jakinaraziko zaie eskatzaileei zein dokumentu aurkeztu behar dituzten, prestazioak jasotzeko eskubidea egiaztatze aldera. Era berean, 2009ko Gizarte Larrialdietarako Laguntzak eskatzeko hitzordua zein egunetan eta ordutan duten adieraziko zaie. Zitak Colon de Larreategui kaleko 13an izango dira.

Gizarte Ekintza Sailak, hilaren 22az geroztik, telefonoz eta eskutitz bidez eman die zita iaz laguntza hori jaso zuten 65 urtetik gorako 1.600 pertsona baino gehiagori; modu horretan, talde horrek ez du aurretiko zitarik pasa beharko. 2008an Gizarte Larrialdietarako Laguntzarik eskatu ez duten 65 urtetik gorako pertsonen kasuan, aurretiko zitaren sistema erabili beharko dute laguntzak eskatzeko.

2009ko Gizarte Larrialdietarako laguntzetarako eskubidea izateko, urteko sarrerak oinarrizko errenta 1,5 aldiz baino txikiagoak izan behar dira; esate baterako, 11.531 euro bizikidetzako unitatea kide batekoa bada edo 16.380 euro unitatea bost kidek osatzen duten kasuan. Gainera, kontuan hartuko da eskatzailearen ondarea laguntza jasotzeko, eta 30.750 eurotik beherakoa izan beharko da kide bateko bizikidetza-unitateetan eta 43.680 baino baxuagoa hiru edo kide gehiagoko bizikidetza-unitateetan.

Gizarte Larrialdietarako Laguntzaren izenean 1.500 eta 2.640 euro artean jasotzen dira urtean, eta aldatu egiten dira eskatutako laguntza motaren arabera eta bizikidetza unitatearen arabera. Prestazio horiek eskuratzeko kontzeptuak honakoak dira: etxebizitza edo ohiko ostatua izateko eta mantentzeko derrigorrezko gastuak; bizigarritasunaren eta oinarrizko ekipoaren gaineko gastuak; lehentasunezko beharretarako gastuak, Osasun Zerbitzu Publikoak artatu gabeak; eta aurretiko zorpetzearen gastuak.

2008KO DATUAK

Guztira, 10.991.393 euro banatu ziren Bilbon 2008. urtean zehar Gizarte Larrialdietarako Laguntzetarako 7.422 espedienteren artean, hau da, 2007an baino %6 gehiago. Espediente bakoitzeko batez besteko laguntza 1.480 eurokoa izan zen, eta 386 eskaera atzera bota ziren. Aurretiko zitetan emandako informazioari esker, hutsune formalak zituzten eskaera asko gutxitu ziren.

San Frantzisko-Abusu eta Santutxu-Bolueta auzoetako bizilagunek eskatu zituzten gehien, laguntzen %15 eta %11, hurrenez hurren. Laguntzen %72 emakumezkoek eskatu zuten eta %24, 65 urtetik gorako pertsonek; azken horietan %78 emakumezkoak izan ziren.

Gizarte Larrialdietarako Laguntzetan, %39a etorkinek eskatu zuten, 83 herrialde ezberdinetakoek. Pertsona horietako gehienak Kolonbiakoak (%21), Boliviakoak (%20) eta Marokkokoak (%9) izan ziren.

Kontzeptuen arabera, laguntza gehienak etxebizitzarako eman ziren (%58); ondoren, etxebizitzaren mantentzerako (%20), aurretiko zorpetzerako (%13), lehentasunezko beharretarako (%8) eta etxeko konponketak egiteko (%1).


214 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin