Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Bilboko Merkataritza Ganberak bulego berria ireki du Getxon eskualdearen lehiakortasuna indartu aldera


2006-12-01 16:15

BILBO, 1 (EUROPA PRESS)

Getxoko Udalak eta Bilboko Merkataritza, Industria eta Nabigazioko Ganberak hitzarmena sinatu dute gaur merkataritza-erakundearen bulego berria Getxon zabaltzeko, Algortako Behargintza zentroan, hain zuzen ere. Hitzarmenaren helburua da Bilboko Merkataritza Ganberak eskaintzen dituen zerbitzuetako batzuk urreratzea Getxoko eta Uribe Kosta eskualdeko enpresa txiki eta ertainei eta salerosleei, inguruko lehiakortasuna indartzeaz gain.

Izan ere, merkataritza-erakundeak eskualdeko eta bertako azpiegituren garapen sozio-ekonomikoa babestu eta handitzeko asmo du. Bilboko Merkataritza Ganberak iaz abiatu zuen bere zerbitzuak deszentralizatzeko bidea hainbat bulego irekiz, eta gaurtik aurrera Getxokoa gehituko zaie.

Bilboko Merkataritza Ganberako zuzendari nagusi Juan Luis Laskurainek eta Getxoko alkate Iñaki Zarraoak sinatu dute gaur hitzarmena. Zarraoak eta Laskurainek nabarmendu dute enpresen, autonomoak diren profesionalen eta enpresa sortzeko asmoa dutenen eskariei erantzuna emateko oso garrantzitsua dela hitzarmena.

Zarraoak adierazi duenez, Getxo da lekurik aproposena ordezkaritza hau irekitzeko eskualde buru delako, inguruko udalerriekin harreman ona duelako eta toki bikainean dagoelako.

Laskurainek, bere aldetik, gaineratu du bere bazkideengana, bezeroengana, erabiltzaileengana eta, oro har, gizartearengana urreratzeko eta hauei ateak zabaltzeko Ganberaren helburua lortu aldera urrats garrantzitsua dela.

Bilboko Merkataritza Ganberak hainbat esparrutan eskainiko ditu bere enpresa-zerbitzuak, hala nola, nazioartekotzean, trebakuntzan, enpresa arteko auzien konpontzean, merkataritza-aholkularitzan, berrikuntzan, herri barruko merkataritza-gunearen laguntzan eta turismoaren garapenean.

Bulego berriak Behargintzeekin lankidetzan jardutea ahalbidetuko du, eskualdeko lehiakortasuna indartu aldera. Zerbitzua Getxoko Behargintzan dago, Algortako Martin Deuna kaleko 17an, hain zuzen ere.

Halaber, gaurko prentsaurrekoan, Getxo eta Uribe Kostako ekonomiari eta enpresari buruzko txostena aurkeztu dute. Getxori dagokionez, zerbitzuen sektorea udalerriko ekonomiaren indarraren %80 da, %19 duen industriaren, %1,70 duen etxegintzaren eta soilik %0,10 duen lehen sektorearen aurretik.

Getxon 6.380 enpresa eta saltoki daude, eta horietatik %90 zerbitzuen sektorearen barruan dago; Bizkaia osoan dauden saltoki guztien %6 dira.

Azken estatistikek erakutsi dutenez, Getxoko biztanle bakoitzeko errenta Bizkaiko maila handienekotan hirugarrena da, Laukiz eta Sukarrietaren atzetik, 14.920 eurorekin. Bizkaiko batez bestekoaren gainetik dago zenbateko hori.


297 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin