Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Bilbo Zaharreko leku interesgarrien planoa atera du Bilboko Udalak bertako bazterrak ezagutarazteko


2006-12-01 11:47

BILBO, 1 (EUROPA PRESS)

Bilboko Udalak, Bilbo Zaharra, San Frantzisko eta Zabala errehabilitatzeko udal bulegoaren eta auzo horiek errehabilitatzeko mahaiaren bidez, auzo horietako leku interesgarrien planoa atera du, hango bazterrik garrantzitsuenak ezagutarazteko. Bilbo Zaharreko, San Frantziskoko eta Zabalako baliabide eta leku interesgarrietara (zentro ofizialak, sanitarioak, hezkuntza eta kultur arlokoak, merkataritzakoak, aisialdikoak eta eraikin bereziak) heltzeko erraztasunak ematea da planoaren helburua.

Informazio hori daroan foiletoa Begiztatu Bilbo Zaharra programaren barruan sartzen da eta Bilboko zentro ofizialetan, turismo-bulegoetan, auzo-etxeetan eta elkarteetan banatuko da, besteak beste. Gainera, Errehabilitaziorako Udal Bulegoan ere eska daiteke, bertara joanda, telefonoz zein posta elektronikoz (oficrehablv@ayto.bilbao.net).

Guztira, 42 leku interesgarri agertzen dira planoan, honela banatuta: zentro ofizialak, osasun eta gizarte ongizate arlokoak, hezkuntza, arte eta kultura arlokoak, eraikin eta sektore bereziak eta plazak. Auzorako sarbideak eta tren eta metroaren hurbileneko geltokiak ere markatuta agertzen dira.

BISITA GIDATUAK

Bestalde, eta programa beraren barruan, Bilboko Udaleko iturriek nabarmendu dute arrakastatsuak izan direla maiatzetik urrira bitartean Bilbo Zaharrera egindako 102 bisitaldi gidatuak. Hasieran irailean amaitzekotan ziren bisitaldiok baina azkenean urrira arte luzatu ziren.

Aurretiaz kalkulatutako plazen %97 erreserbatu dira, hau da, 2.040 plazatik 1.982. Plaza guztien %78 bete dira (1.606 bisitari). Erreserba-kopurua kontuan hartuta auzoa bertatik bertara ezagutzeko jendeak duen interesa baloratzen da.

Lau ibilbide izan ditu programak. Lehenengo ibilbidea, Bilbo Zaharra: atzo eta gaur izan da jende gehienak eskatu duena, 975 lagunek; gainerakoak Bilbo alternatiboa, Bilbo Zaharra eraldatzen eta Elementu bitxiak izenekoak izan dira eta 296, 162 eta 173 bisitari izan dituzte, hurrenez hurren.

Bisita hauen bidez auzoaren berezitasunak erakutsi nahi izan zaizkie bilbotarrei eta bisitariei. Bilbo Zaharreko errealitateak jarri dira agerian lau ibilbide horiekin, kuttunenetatik hasi eta aurrerakoienetara.

Arrakasta honi esker, datorren urtean ere bisita gidatuen programa egin ahal izango da formatu berarekin eta ibilbide eta leku interesgarri gehiago sartuta.


143 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin