Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Bederatzi proiektuk dute VI. Manuel Laborde Werlinden saria irabazteko aukera


2006-11-14 17:20

DONOSTIA, 14 (EUROPA PRESS)

Euskal Herriko Unibertsitateak eta Bic Gipuzkoa Berrilanek enpresa proiektu berritzaile onenarentzako antolatzen duten Manuel Laborde Werlinden saria banatuko da bihar, arratsaldeko 18,30etan hasiko den ekitaldian, EHUko Gipuzkoako campuseko Ignacio Mª Barriola eraikineko auditorioan, antolakuntzako iturriek gaur jakinarazi dutenez.

Banaketa ekitaldian izango dira Miguel Angel Gutierrez, EHUko Ikerketako errektoreordea; Cristina Uriarte, EHUko Gipuzkoako campuseko errektoreordea; Marisa Arriola, Bic Gipuzkoa Berrilaneko zuzendari kudeatzailea; Joaquin Villa, Gipuzkoako Foru Aldundiko Berrikuntza eta Ezagutzaren Gizarteko Saileko diputatua; eta Mauri Lazkano, Industriaren Sustapen eta Eraldaketarako Sozietateko (SPRI) zuzendari nagusia. Gainera, ekitaldian, Fernando Trias de Bes ekonomialari eta idazlea Enpresa berrikuntzaren bideak gaur egun gaiari buruz mintzatuko da.

Guztira bederatzi proiektuk dute VI. Manuel Laborde Werlinden saria irabazteko aukera. Gehiengoak Informatika Fakultatekoak dira, baina badira Psikologia, Arkitektura eta Zientzia eremuetatik datozenak ere.

Lehenengo sariak 7.500 euroko zenbatekoa irabaziko du, eta bigarren proiektu saridunak, berriz, 3.500 euro. Gainera, proposamen berritzaileek edota oinarri teknologikokoek Bic Gipuzkoa Berrilanek kudeatu eta Gipuzkoako Foru Aldundiaren Berrikuntza eta Ezagutzaren Gizarteko Sailak eta SPRIk antolatzen dituzten laguntzak lortu ahal izango dituzte. Laguntza horiek 60.000 eurorainokoak izan litezke, proiektuen berrikuntza mailaren eta interesaren arabera.

Epaimahaiak honako irizpideak kontuan hartuko ditu hautagaiak ebaluatzeko: ekintzaileen ezaugarriak, produktuaren edo zerbitzuaren berrikuntza maila, produktuak edo zerbitzuak merkatuan daukan bideragarritasun maila eta epe ertainera lana sortzeko daukan ahalmen maila.

Manuel Laborde Werlinden, industri ingeniari naturazalea, Aranzadi Zientzi Elkarteko sortzaileetako bat izan zen 1947an. Partaidetza erabakigarria izan zuen Joxe Miel Barandiaran Saratik mugaren alde honetara itzuli ahal zedin. Bi trikuharri, 14 estela eta Marizulo historiaurreko haitzuloa aurkitu zituen Gipuzkoan.

1988an, Eusko Ikaskuntzaren Manuel Lekuona saria irabazi zuen, erakunde horretako Zientzia Fisiko, Zientzia Kimiko eta Matematiken saileko lehendakaria izan zelarik. Donostian zendu zen, 1993ko maiatzaren 12an.


114 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin