Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Bai Eskolak Euskalduntzeari! sinadura bilketa kanpaina abiarazi dute zenbait elkartek eskolak euskalduntzearen alde


2006-02-09 12:22

BILBO, 9 (EUROPA PRESS)

Gaur egun indarrean diren hizkuntza ereduek eskolak euskalduntzean bete beharreko funtzioa eragozten dutela sinetsita, Eskolak Euskaldundu ekimenak sustatuta eta hainbat gizarte eragileren babesean Bai Eskolak Euskalduntzeari! sinadura bilketa kanpaina abian da.

Erabili.com wegbunearen esanetan, irakaskuntzan orain arte indarrean izan diren hizkuntza politikak agorturik daude eta euskalduntzea bermatuko duen hizkuntza politika berria nahitaezkoa da. Ideia horren inguruan indarrak biltzeko asmoz, Eskolak Euskaldundu ekimenean gauden eragileok ekimen berri bat sustatu nahi dugu ikasturte honetan, orain arteko kanpainen ildoan baina horiek baino harago helduko dena.

Gaur egungo hizkuntza politiken eraginez, euskal ikasleen hizkuntza eskubideak urratzen dira. Urraketa hau, nagusiki, bi modutan ematen da: alde batetik, ikasleen gehiengo zabalari euskara ezagutzeko eskubidea ukatzen zaio, Euskal Herri osoan; eta horrekin batera, Euskal Herriko hainbat eremutan (bereziki, baina ez bakarrik, Nafarroan eta Ipar Euskal Herrian) euskaraz ikasteko aukera bera da ukatzen zaiena.

Hiru ikasletik bi ez da euskaldunduko, antolatzaileen arabera. Euskal ikasleriaren hizkuntza-argazkiak 89.666 euskal ikaslek klase guztiak gazteleraz edo frantsesez jasotzen ditu, euskarazko irakasgairik gabe (ikasleriaren % 20,7). Bestalde, 106.269 euskal ikaslek klase guztiak gazteleraz edo frantsesez jasotzeaz gain, Euskara irakasgaia ematen dute, lau ordu astean (ikasleriaren % 24,6).

Gainera, 72.419 euskal ikaslek hainbat klase erdaraz eta beste hainbat euskaraz jasotzen ditu (ikasleriaren % 16,7) 164.375 euskal ikaslek klase guztiak euskaraz jasotzen ditu, eta Gaztelania edo Frantsesa irakasgaia ematen du astean lau orduz (ikasleriaren % 38).

Ikasle hauetatik, zenbatek amaituko dituzte ikasketak euskara behar bezala menperatuz? Erantzuna ezberdina izango da euskara behar bezala menperatzea kontzeptuaz egiten dugun definizioaren arabera.



EAEko Hezkuntza Sailak 2005ean euskara maila neurtzeko eginiko froga hartuta oinarritzat, nahiz eta froga hori gainditzeak ez duen derrigorrez suposatzen ezagutza behar bezala menperatzen denik. Edozein kasutan ere, kontua da A ereduko ikasle guztiek, B ereduko ikasleetatik % 67ak eta D ereduko ikasleetatik % 32ak ez zutela froga hori gainditu.

Bestalde, kontuan hartu behar dugu eskola amaitu ostean gazte askok euskara maila galtzen dutela, eguneroko bizitza nagusiki erdaraz egiten dutelako. Beraz, eskolak euskalduntzen duen populazioaren portzentaia hori ez da bere horretan mantentzen denboran zehar eta hori ere kontutan hartzekoa da.

Ondorio nagusi bezala eskolak egun ez duela euskalduntzen eta milaka direla euskara ezagutu gabe irtengo diren haur eta gazteak. Egoera honek euskararen normalizazioa guztiz trabatzen du eta gure hizkuntzaren geroa bera ere zalantzan jartzen du.

EUSKARAZ IKASTEKO AUKERA BERA UKATU EGITEN DA HAINBAT EREMUTAN

Euskal Herriko hainbat eremutan euskaraz ikasteko aukera bera ukatu egiten da. Hau da, kontua ez da soilik eskualde horietako hainbat eta hainbat ikasle ez direla euskalduntzen, baizik eta horretaz gain euskaraz ikasteko mugak jartzen dituela administrazioak, eraso argiak bideratuz.

Bestalde, Frantziako Gobernuak ere euskal irakaskuntza erasotzeko politika bera jarraitzen du. Sare publiko elebidunean, pribatu elebidunean nahiz ikastoletan, toki guztietan nabariak dira politika horren ondorio kaltegarriak.

Aldaketaren beharra, aldaketarako aukerakEra ezberdinean bada ere, orain arteko hizkuntza politika aldatzeko beharra nabaria da Euskal Herria banatua dagoen hiru esparru administratiboetan:

Araba, Bizkaia eta Gipuzkoan, Hezkuntza sailak hizkuntza ereduen politikaren porrota aitortu egin zuen publikoki, Iztuetaren agintaldiaren amaieran. Aldaketa bat egongo dela gauza nahiko ziurra dirudi. Kontua da ea noraino iritsiko den balizko aldaketa hori. Jadanik aldaketa horren inguruko mezuak entzuten gabiltza alderdi politiko eta agintari ezberdinen eskutik.

Beraz, ondorio nagusia bezala oro har Euskal Herrian bistakoa da egungo errealitatetik belaunaldi berrien euskalduntzea erdiestea ezinezkoa dela eta honen aurrean, euskalduntzearen alde eragileen artean mugimenduak gertatzen ari direla eta eztabaida maila garrantzitsua hartzen ari da, sinatzaileen ustetan. Osoko euskalduntzearen aldeko aldaketa baten premia indarra hartzen ari den errealitatea dugu.

Azaldutako egoerak, indarrak biltzea eta aktibatzea eskatzen du. Inoiz ez bezala, eskola bidez haurren euskalduntzea bermatzeko aukerak zabaltzen ari direla pentsatzen dugu eta horregatik beharrezkotzat jo dugu euskalduntzearen aldeko eskaera areagotzeko kanpaina berri bat abiatzea: Bai Eskolak Euskalduntzeari! lelopean egingo den sinadura bilketa erraldoia.

Ekimenaren bitartez, eskola bidez haur guztien euskalduntzearen beharra lau haizetara zabaldu nahi dugu eta Euskal Herrian hezkuntza eskumenak dituzten instituzioetara eskakizuna bideratuko da. Helburua, Euskal Herri osoan milaka herritarren sinadurak biltzea da eta hauen bitartez instituzioei egun indarrean diren eredu edo politikak gainditu eta euskalduntzea bermatzeko prozesuak zabal ditzaten eskatzea dugu helburu. Egoeraren larritasunak batetik eta egoera hori gainditzeko aukera berriak zabaltzeak bestetik, erronka handi bat planteatzera ekarri gaitu.

Sinadura bilketa kanpaina hau otsailetik maiatzera bitartean egingo da. Eskualdez eskualde batzarrak egingo dira, lekuko kanpaina diseinatzeko. Hortik aurrera, Euskal Herriko txoko guztietan hedatuko da izenpetzeen kanpaina: ikastetxeetan, kaleetan, lantegietan, euskaltegietan, eragile ezberdinen baitan...

Ekimen honen inguruan batu garen eragileok, euskal herritar eta eragile guztiei kanpainarekin bat egin eta euskalduntzearen alde indar egiteko deialdia luzatu nahi diegu. Eskolak euskalduntzearen alde euskal herritar bakoitzaren sinadura ezinbestekoa zaigu, euskararen berreskurapenaren bidean urrats berriak eman ahal izateko.

EUSKALDUNTZE OSOA BERMATZEKO NEURRI ZEHATZAK

Bai Eskolak Euskalduntzeari! goiburuarekin, sinadura emango dutenek izenpetuko duten manifestu eta eskaera orri labur bat osatu eta plazaratu dugu (sakatu HEMEN ikusteko).

Manifestu horrekin bat egiten hasi dira dagoeneko hainbat lagun eta eragile. 2006-2-4an Bilbon kanpainaren barruan ekitaldia ere egin genuen eta bertan zenbait pertsonaia ezagunek ere bat egin zuten kanpainarekin, beraien sinadurak emanaz.

Gotzon Garate hizkuntzalaria izan zen horietako bat. Hona hemen berak ekitaldian esandakoak: Gaur, Bilbon bildu garen esparru ezberdinetako pertsona ezberdinek Euskal Herrian abian den Bai Eskolak Euskalduntzeari! sinadura bilketa kanpainari gure babesa adierazi nahi diogu. Milaka herritar protagonista bihurtu nahi dituen kanpaina honen bidez eskola guztietan euskararen ezagutza ziurta dadin eskaera indartzen dela deritzogu. Guk ere, eskaera horren protagonistatzat hartzen dugu gure burua eta horregatik, gure sinadura emango dugu eta herritar guztiei sina dezaten eta sinatzaile gehiago lor ditzaten deia luzatu nahi diegu. Euskarak guztion parte hartzea eta konpromisoa eskatzen duelako.

Eskolak Euskaldundu Ekimenak sustatu du, esan bezala, Bai Eskolak Euskalduntzeari! kanpaina, baina Euskal Herriko hainbat eragileren babesarekin ekin dio bideari: Kontseilua Euskal Konfederazioa Oinarriak Euskara Elkarteen Topagunea AEK IKA Euskal Herrian Euskaraz (EHE) Udako Euskal Unibertsitatea (UEU) Euskal Irratiak Ikas Sortzen Ikasbatuaz LAB Euskal Herriak Bere Eskola (EHBE) Ikasle Abertzaleak (IA)


163 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin