Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Arriskuen ebaluazioko adituek esperientziak trukatu dituzte Bilbon elikagaien segurtasunaren arloan ahaleginak batzeko


2009-02-13 13:42

BILBO, 13 (EUROPA PRESS)

Elikagaien Arriskuen Ebaluazioari buruzko II. Jardunaldia ospatu da gaur Bilboko Euskalduna Jauregian, eta bertan bertoko eta Europa mailako erakundeetako adituek hainbat ebaluazioren emaitzak aurkeztu eta esperientziak elkar trukatu dituzte elikagaien segurtasunaren arloan ahaleginak batzeko asmoz.

Bigarren jardunaldi hori 2005ean egindako Elikagaien Segurtasunari buruzko I. Jardunaldiaren jarraipena da. Orduko jardunaldian ondorioztatu zuten ezinbestekoa dela erakundeen artean informazioa trukatzea elikagaien arriskuekiko esposizioa murrizteko.

Eusko Jaurlaritzako Nekazaritza, Arrantza eta Elikadura sailburu Gonzalo Saenz de Samaniegok eta Osasun Saileko sailburu Gabriel Inclanek inauguratu dute bi sailek eta Nekazaritzako Elikagaien Segurtasunerako Euskal Fundazioak (ELIKA) antolatu duten jardunaldia.

Bi sailburuek azpimarratu dute beharrezkoa dela elkarlanean aritzea, bakarkako eta une jakin bateko jarduerek ez baitute inolako zentzurik nekazaritzako elikagaien segurtasun politikan. Baina, zientzia ezagutza, eta analisi eta balioztapen neurriak trukatzeak prebentzio eta kontrol sistema hobea ezartzen laguntzen du.

Halaber, azpimarratu dute arriskuen ebaluazioak independentea, bikaina eta gardena izan behar duela elikagaien segurtasunerako prebentzio politikak abian jartzeko, hau da, elikagaiak kontsumitzeagatik herritarrek jasan ditzaketen arriskuak murrizteko.

Helburu hori lortzeko, duela zazpi urtetik Eusko Jaurlaritzak Nekazaritzako Elikagaien Segurtasuneko Zientzia Batzordearen aholkularitza jaso izan du. Zazpi urteotan 22 elikagai-arriskuekiko euskal herritarren erakusketa aztertu du, eta 30 jarduera baino gehiago gomendatu ditu arrisku hori murrizteko.

Horrela, gaurko jardunaldian, aipatu batzordeko kide batzuek hainbat adibide praktiko aztertu dituzte, besteak beste, arrain produktuen bidez kadmioa kontsumitzeko arriskuaren ebaluazioa, landare produktuen bidez nitrato eta nitritoak kontsumitzeko arriskua, dietaren bidezko akrilamida kontsumoa, arrautzaren salmonellarena edo oso patogenoa den hegazti-gripearena.

Ondorengo agentzietako ordezkariek ere parte hartu dute jardunaldian: Elikagaien Segurtasuneko Europako Agintaritza (EFSA), Elikagaien Segurtasuneko Espainiako Agentzia eta Elikagaien Segurtasuneko Kataluniako Agentzia. Gainera, Europan egiten den arriskuen balioztapenaren egoerari buruz ere eztabaidatu da.

I. JARDUNALDIA

Esan bezala, Euskalduna Jauregian egin den jardunaldia 2005eko apirileko Elikagaien Arrisku Ebaluazioari buruzko I. Jardunaldiaren jarraipena da. Jardunaldi hartan ere parte hartu zuten Elikagaien Segurtasun arloko Europako erreferenteek.

Esaterako, honako hauek izan ziren gonbidatuak: EFSA, Abere Osasunerako Mundu Erakundea (OIE), Elikadura eta Nekazaritzarako Nazio Batuen Erakundea (FAO) eta arriskuen balioztapenean ospe handia duten Europako hainbat erakundetako ordezkariak.

Orduko jardunaldian ondorioztatu zuten beharrezkoa dela arriskuen ebaluazioak lurralde jakin bati aplikatuta egotea, onartu arren ezinbestekoa dela informazioa eta arriskuen ebaluazioen emaitzak trukatzea nazioarteko, nazio eta eskualde mailan.


929 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin