Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Arnas gaixotasunen ondoriozko ospitaleratzeak %11,4 hazi ziren EAEn 2005. urtean


2006-12-19 12:13

Ospitaleratzeko arrazoi nagusi diren zirkulazio-sistemako gaixotasunak %2,2 jaitsi ziren akutuen ospitaletan

BILBO, 19 (EUROPA PRESS)

Arnas aparatuko gaixotasunengatik izandako ospitaleratzeak %11,4 igo ziren Euskal Autonomia Erkidegoan (EAE) 2005. urtean, akutuentzako ospitaleetan; horrenbestez, ospitaleratzeko arrazoien artean, arnas gaixotasunak laugarren tokian kokatu dira (seigarrenak ziren 2004an). Horien artean, alde batetik bronkitis kronikoa eta pneumonia nabarmentzen dira gaixotasun ugarienen artean, eta, bestetik, 2004. urtearen aldean, gripeagatiko ospitaleratzeak laukoiztu egin ziren, Eustaten datuen arabera.

2005. urtean, 280.441 ospitaleko alta egon ziren: 222.398 pertsona ospitaleratuta egon ziren edo tratamendua jaso zuten akutuentzako ospitaletako eguneko unitateren batean. Alten portzentajea aurreko urtean baino %1,3 handiagoa izan zen. Batez beste ospitalean egondako denbora 5,5 egun izan ziren (5,4 egun 2004an).

Joan den urtean mediku-alta jaso zutenen %76, ospitale publikotan egon ziren, eta %24 ospitale pribatutan. Sexuaren arabera, pertsonen %51 emakumezkoak izan ziren, eta %49 gizonezkoak. Hori bai, haurdunaldiak eta erditzeak sartzen ez badira, gizonezkoen ehunekoa %53,4ra igotzen da. Ospitaleratzen diren gizonezkoen artean gehienbat 73 urtekoak daude; aitzitik, emakumezkoen artean 78 urtekoak daude (haurdunaldia eta erditzea kontuan hartu gabe).

Ospitaleratzeko arrazoi nagusi izaten jarraitzen duten zirkulazio-sistemako gaixotasunak alta guztien %12,6 izan dira 2005ean (2004an %13,1); beraz, %2,2 jaitsi dira 2004. urtearen aldean. Talde horretan gehien diagnostikatutako gaixotasunak honako hauek izan ziren: gutxiegitasun kardiakoa, aterosklerosi koronarioa, zain barizedunak eta arritmiak.

Ospitaleratzeko bigarren arrazoia digestio-aparatuko gaixotasunak izan dira, alta guztien %11,5ekin. Gaixotasun arruntenak hauek izan dira: izterrondoko etena (%15,6), behazun-harriak (%15,3) eta apendizitis akutua (%7,3).

Eguneko ospitaleek nerbio-sistemako eta zentzumen-organoetako gaixotasunen tratamenduetan duten garrantzia ikusita (begi-lausoak bereziki), gaixotasun horiek hirugarren daude, alta guztien %9,8rekin. Arnas aparatuko gaixotasunen ehuneko bera dute, eta azken horiek laugarren tokian daude, tumoreen (%8,9) eta haurdunaldiko, erditzeko eta erditze ondoko arazoen (%8,8) aurretik.

HERIOTZAK

Heriotzen ehunekoa %2,9 izan zen. Hiltzeko adinik arruntena 74 urte izan zen gizonezkoen artean eta 85 emakumezkoen artean, eta arrazoi nagusiak, gutxiegitasun kardiakoa (lehen arrazoia emakumeen artean), pneumonia, eta trakeako, bronkioetako eta biriketako neoplasia gaiztoa (lehena gizonezkoen artean) izan ziren.

Berriz ospitaleratzen direnen tasa %5,7koa izan zen. Tasa horrek zerikusia du batez ere zenbait gaixotasunen tratamenduarekin, hots, kimioterapia-tratamenduarekin (mantentze-kimioterapia) eta bronkitis kroniko buxatzailearen tratamenduarekin. Ospitalean emandako egunen batez bestekoa 3,9 egun eta 9,3 egun izan dira, hurrenez hurren.

Maizago gertatzen diren gaixotasunen hurrenkera ezberdina da sexuaren arabera. Esan bezala, gizonezkoen artean zirkulazio-aparatuarekin zerikusia duten gaixotasunak izan dira ospitalean sartzeko lehen arrazoia, eta horren atzetik datoz digestio-aparatukoak eta arnas aparatukoak. Emakumezkoen artean, zirkulazio-aparatuko gaixotasunak hirugarren tokian daude, haurdunaldiko, erditzeko eta erditze ondoko gaixotasunen, eta nerbio-sistemako eta zentzumen-organoetako gaixotasunen atzetik.

Adin taldeak kontuan hartuta, 0-14 urteko biztanleen artean gehien diagnostikatutako gaixotasunak amigdalitis kronikoa eta adenoideak izan ziren. 14-44 urtekoen artean, belauneko barrualdeko arazoak eta apendizitis akutua, gizonezkoetan, eta haurdunaldia eta erditzea, emakumezkoetan. 45-64 urtekoen taldean, izterrondoko etena nabarmentzen da gizonezkoetan, eta neuropatia multifokala eta zain barizedunak emakumezkoetan. 65 urtetik gora dutenen artean, begi-lausoa da gehien diagnostikatutako gaixotasuna, eta horren atzetik bronkitis kronikoa gizonetan eta osteoartrosia emakumezkoetan.

Begi-lausoa, nerbio-sistemako eta zentzumen-organoetako gaixotasunen taldean sailkatutako gaixotasuna, ez da soilik akutuen ospitaletan gehien diagnostikatzen den patologia. Horrez gain, ebakuntza kirurgiko gehien eragin dituen gaixotasuna da, ospitale publikoetan gehienbat (%87,7). Horren atzetik datoz erditzean egindako zaintzak eta aldakako nahiz belauneko protesia ipintzea.

Gehien egindako ebakuntza kirurgikoak, adin-taldeen eta sexuaren arabera ondokoak dira: 0-14 urte dituztenen taldean, amigdalen eta adenoideen nahiz apendizearen ebakuntzak; 14-44 urtekoen taldean, belauneko ebakuntzak gizonezkoetan eta prozedura obstetrikoak (erditzean laguntza ematea edo erditzea eragitea) emakumeetan; 45-64 urtekoen taldean, hernia konpontzea gizonetan, eta ume-tokiko eta bularreko ebakuntzak emakumeetan; eta 65 urtetik gora dituztenen taldean, begi-lausoaren ebakuntza.


128 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin