Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-54 herrialdetako 582 etorkin aritu ziren 2008an euskara ikasten AISA harrera-ikastaroen bitartez


2009-01-07 13:24

Eusko Jaurlaritzako Kultura eta Etxebizitza eta Gizarte Gaietako saila hitzarmena berritu dute programa hau finantzatzen jarraitzeko

DONOSTIA, 7 (EUROPA PRESS)

Miren Azkarate Eusko Jaurlaritzako Kultura sailburuak, Javier Madrazo Etxebizitza eta Gizarte Gaietako sailburuak eta Joseba Erkizia HABEko zuzendari nagusiak AISA harrera-ikastaroak finantzatzeko hitzarmena berritu dute gaur Donostian egindako prentsaurrekoan.

Bertan jakitera eman dutenez, 2008. urtean 49 harrera-ikastaro antolatu ziren, eta 54 herrialdetako 582 etorkin helduek parte hartu zuten. Horrela, AISA programa 2004an saio pilotu gisa martxan jarri zenetik, 1.788 izan dira ikastaro hauek egin dituzten ikasleak. Jatorriz gehienak amerikarrak dira: adibidez, 2008 amaitu berrian, %65 Ertamerika eta Hego Amerikatik etorritakoak izan ziren euskara ikasten aritu zirenak.

AISA programa azken urteotan Euskadira etorri diren etorkinei zuzendutako ekimena da, Immigraziorako Euskal Planaren baitan kokatzen da eta Kultura Sailak HABEren bitartez sustatu du Etxebizitza eta Gizarte Gaietarako Saileko Inmigrazio Zuzendaritzarekin lankidetzan. 2005eko abenduan bi Sailek lankidetza-hitzarmen baten bitartez formalizatu zuten egitasmo hau, eta urtez urte berritzen dute, urtean emandako ikastaro guztiak biltzen dituen eranskina sinatuz.

Azkaratek nabarmendu duenez, Euskadik, garapen ekonomiko eta sozial egokia izan nahi badu, etorkinak behar ditu, eta AISA harrera-ikastaroen bitartez, etorkinak euskal kultura eta euskara ezagutzen hasteko modua eskaintzen zaie etorkin helduei.

Madrazok gaineratu du heldu horietako askok seme-alabak dituztenez eta seme-alabak eskolaren bitartez euskara ikasten dutenez, AISAren bidez seme-alaba horien ikaskuntza prozesuan laguntzeko eta eragiteko modua eskaintzen zaiela guraso etorkinei.

Horren harira, Azkaratek azaldu du euskaltegi sare orokorrean hirukoiztu egin dela etorkinen kopurua azken zazpi urteetan: 2001-2002 ikasturtean, 476 ikasle etorkin zeuden bitartean, 2008-2009 ikasturtean 1.600 ikasle etorkin daude.

Datuok erakusten dute etorkinen populazioan gero eta interes handiagoa dagoela euskara ikasteko. Horregatik guztiagatik, Kultura Sailaren asmoa da honelako programak bultzatzen jarraitzea, etorkinak euskararen unibertsoan txertatzeak gizarte-kohesioari eta elkarbizitzari mesede besterik egiten ez diolako, azaldu du.

IMMIGRAZIORAKO EUSKAL PLANA

Immigraziorako Euskal Planak (2003-2005), pertsona guztiek euren eskubideak eta betebeharrak berdin baliatzeko eta aintzat hartzeko aukeraren mesedetan hartutako neurrien artean, atzerritarren artean Euskal Autonomia Erkidegoko (EAE) bi hizkuntza ofizialen ikaskuntza sustatzea proposatzen du.

Horrela, planaren proposamenen artean dago EAEn bizi diren atzerritarrei euskara irakasteko hizkuntza harrerako ikastaroak eskaintzea (60 ordukoak). Hemengo gizartearen ezaugarriak ezagutu eta euskara ikasteko programa honetan oinarrizko euskara-ezagupena lantzen da, berariaz etorkinentzat prestatutako ikas-materialen eta ikastaroen bitartez. EAEn bizi diren etorkin helduak gerora euskalduntze-sare orokorrera joatea errazteko helburua ere badute AISA harrera-ikastaroek.

Ikastaroak finantzatzeko, Etxebizitza eta Gizarte Gaietako Sailaren eta Helduen Alfabetatze eta Berreuskalduntzerako Erakundearen (HABE) arteko hitzarmena sinatu zen 2005. urtean. Finantzaketa HABEk eta Immigrazio Zuzendaritzak egiten dute, erdi bana (ikastaro bakoitzaren kostu osoa 2.920 eurokoa da).

HABEk homologatutako sareko euskaltegietan ematen dira ikastaroak, eta udal euskaltegien sareko eta euskaltegi pribatu homologatuen sareko euskaltegiek parte hartu ohi dute. Udalekin (Euskara nahiz Gizarte alorreko teknikariekin) eta etorkinen elkarteekin lankidetzan antolatu ohi dira, eta eskaria beti euskaltegiak edo udalak egin behar du, eta HABEk onartu.

AISA programa izaten ari den arrakasta kontuan hartuta, 2009rako diru-ekarpena 70.000 eurora (alde bakoitzak) igotzea adostu dute HABEk eta Immigrazio Zuzendaritzak.


222 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin