Kontaktu zuzena bilatu nahi dute eta Urkullu iradoki dute, jada solaskide izan baita.
Brian Currin abokatu eta nazioarteko gatazketako bitartekari adituak gidatzen duen HNT Harremanetarako Nazioarteko Taldeak, Mariano Rajoyren gobernuari elkarrizketarako eskaintza bat helaraziko dio. ETAren iragarpenaren ostean sortu den aro berriarekin lotutako gaien inguruan elkarrizketa bideak ezartzea da helburua.
Alberto Spektorowsi talde honetako kideetako batek iragarri du Israeletik egindako elkarrizketa batean. ETAren su-etenaren azken urtea oso onuragarria izaten ari dela adierazi du, baina prozesua geldituta dagoela ohartarazi du.
PPrekin bilera bat, edo behintzat, solaskide bat bilatu nahi dugu. Horrela, ezker abertzaleak X pausoa ematen badu, beste aldetik ere Y pauso bat egongo dela ziurtatu nahi dugu, argudiatu du.
Harremanetarako, Urkullu lagungarria izango litzateke, PPrekin ere duen kontaktuarengatik. Jada solaskide izan da eta horrek asko laguntzen gaitu, esan du Speltorowskik. Noski, HNTri talde bezala PPrekin harremanetan egotea gustatuko litzaiguke.
Bere ustez, prozesuaren geldialdia pixka bat PPren emaitza da eta presoen inguruko hainbat mugimendu lehenago egin zitezkeela adierazi du. Garrantzitsua litzateke, izan ere, eskatzen dena gutxienekoa da. Ez da ETArekin hitz egitea. Denek jarraitzea nahi duten prozesuarentzat oinarrizkoa da, adierazi du. Epe luzean alderdi popularrak ondorio horietara iritsi beharko du.
