Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

Biografia: Baltasar Garzon, epaile mediatikoa eta nekagaitza


2012-01-17 08:55

Azken bi hamarkadatan, Garzonen jarduera zorrotza izan da: droga-trafikoaren aurkako operazioak, komunikabideen itxierak, alderdi politikoen ilegalizazioak, Augusto Pinocheten kontrako ikerketak...

Baltasar Garzon epailea 1955eko urriaren 26an jaio zen Jaengo Torres herrian, ezkonduta dago eta hiru seme-alaba ditu. 1981eko otsailaren 13an hasi zuen bere jarduera profesionala eta 1988an iritsi zen Auzitegi Nazionalean.

Baltasar Garzon Espainiako epailerik ezagunena da aurrera eraman dituen ikerketa eta auzi garrantzitsuengatik.


Droga-trafikoaren aurka

Narkotrafikoaren kontrako operazio ugari zuzendu ditu, besteak beste, Necora operazioa 1990ean (Laureaño Oubiñak zuzendutako erakundea desegitea eragin zuen) eta Galizian jarduten zuten Los Charlines klaneko kideen atxiloketa ekarri zuena.


Ezker abertzalearen eta ETAren inguruaren kontrako operazio polemikoak

1998. urtean, ezker abertzalearen eta ETAren inguruaren kontrako polizia-operazio polemiko batzuk agindu zituen Garzon epaileak. Horren erakusle da AEKren zenbait egoitza miatu eta hamar bat lagun atxilotu izana, gerora ETArekin inolako harremanik zutela frogatu ez zen arren.

Urte horretan itxi zituen Egin egunkaria eta Egin Irratia. 2001eko apirilean Ardi Beltza aldizkaria ixteko agindu eman zuen; aldizkariko zuzendaria, Pepe Rei, atxilotu egin zuten, komunikabide hori ETAren helburuen mesedetan erabiltzeagatik.

2001eko azaroan Amnistiaren Aldeko Batzordeen aurkako operazio ikusgarria burutu zuen: 200 bat poliziek hartu zuten parte eta guztira 13 pertsona atzeman zituzten EAEko eta Nafarroako herri eta hiri ezberdinetan.

2002ko urrian Batasunaren jarduerak hiru urtez eteteko erabakia hartu zuen, ETAren egiturako parte zelakoan.

Horrez gain, 2003ko martxoan Espainiako Alderdi Komunistaren aurka egin zuen: alderdiaren jarduerak eten eta Espainian nahiz atzerrian zituen lokalak itxiarazi zituen, GRAPO erakundearen beso politikoa zela argudiatuta.


Oihartzun handiko kasuak

Garzonek bideratutako auzi askok oihartzun handia izan dute bai Estatuan bai Espainiatik harago. 2008ko irailean, esaterako, frankismo garaian izan ziren desagertzeak ikertzeko eskumena zuela ondorioztatu eta 19 hilobi komun irekitzeko agindua eman zuen.

Augusto Pinochet Txileko diktadorea atxilotzeko agindu zuen, bere agintaldian espainiar naziotasuneko herritarrak torturatzea eta hiltzea leporatuta eta gizadiaren aurkako krimenak egitea egotzita; AEBetako Gobernua kritikatu zuen Guantanamoko kartzelan Al Kaidako ustezko kideak bidegabe kartzelatzeagatik; Irakeko gerra publikoki salatu zuen eta Osama Bin Laden atxilotzeko agindua eman zuen.


Akusatuen aulkian

2012eko urtarrilaren 17an, Garzon epaileak Auzitegi Gorenean deklaratuko du, Gurtel auzian prebarikazioa egitea leporatuta; izan ere, aipatu kasuan auzipetuta dauden zenbait pertsonen komunikazioak interbenitzea agindu zuen eta bere aurka salaketa jarri zuten.

Horrez gain, urtarrilaren 24ean beste epaiketa bat izango du, frankismo garaian izan ziren krimenak ikertzeko eskumena zuela aitortzeagatik, eta Auzitegi Gorenean hirugarren aldiz Garzon akusatuen eserlekura eramatea aztertzen ari dira, New Yorken 2005ean eta 2006an eman zituen kurtsoengatik.

Politikagintza

1993an, bere ibilbide judizialenean etenaldia egin zuen eta PSOEko diputatu izan zen, 1994eko maiatzean kargua uzteko erabakia hartu zuen arte.


Baltasar

Informazio gehiago:Eitb: Biografia: Baltasar Garzon, epaile mediatikoa eta nekagaitza

46 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin