Jose Luis Bilbao prest agertu da krisia gainditzeko bidean Jaurlaritzari laguntzeko, baina horretarako bere kontuak argitzea exijitu dio. Bestalde, Bizkaiko Diputazioaren egoera ekonomikoa ona da.
Jose Luis Bilbao ahaldun nagusiak diputazioak gehiago ez xaxatzeko eskatu dio Eusko Jaurlaritzari, baina, aldi berean, krisi ekonomikoari aurre egiteko Bizkaiko Diputazioa elkarlanean aritzeko prest dagoela jakinarazi dio.
Hala ere, zergen igoeraz hitz egiten hasi aurretik, Jaurlaritzak bere egoera ekonomikoa zein den argitu behar du, azpimarratu du Jose Luis Bilbaok Finantzen Euskal Kontseiluak egindako bileraren inguruko iritzia emateko egin duen agerraldian.
Prentsaurreko horretan, Bizkaiko Diputazioaren kontuak osasuntsu daudela eta positiboak direla ere nabarmendu du. 2011ko aurrekontuak errealitateari lotutakoak direla eta aldaketarik edo murrizketarik beharko ez dutela azaldu du.
