Anonymousek Sinde legearen aldekoen datu pertsonalak argitaratu ditu bere blogean, besteak beste, Sinde beraren datuak, egungo kultura ministroarenak edota Bisbalenak.
Anonymous mugimenduak Sinde legearen aldekoen hainbat pertsonen datu pribatuak argitaratu ditu bere blogean. Kaltetuen artean, bestek beste, egungo kultura ministroa, Jose Ignacio Wert eta ministro ohia, Angeles Gonzalez-Sinde daude.
Blogean, gainera, argitaratutako datuak duten informazio guztiaren zati txiki bat besterik ez direla ohartarazi dute.
Sinde legearekin loturarik ez duten pertsonen datuak ez jartzea erabaki dugu, baina etorkizunean euren jarrera aldatzen badute edo zigorren bat jartzeko zerbait egiten badute, gure haserre guztia euren gainean eroriko da, diote blogean.
Argitaratu dituzten datu guztien artean, esanguratsuenak Gonzalez-Sinderenak dira, izan ere, posta elektronikoak, bere etxebizitzaren argazkiak, hainbat mugikorren zenbakiak eta bere senitartekoen informazio pribatua agertzen da.
Egungo ministroaren, Jose Ignacio Werten, xehetasun ugari ere azaltzen dira, baita bere familiarenak ere.
Gainera, Carlos Bardem, David Bisbal edota Chus Gutierrezen datuak ere argitaratu dituzte. Eta Sinde legea babesten duten produktoreen eta politikarien informazioa ere jarri dute, besteak beste Carmen Alboroch poltikariarena eta Vicente Molina Foix idazlearena.
Lehengo urtean egin zuten moduan, Anonymousek datorren otsailaren 19an egingo duten Goyen ekitaldira ordubete lehenago euren maskararekin joateko deialdia egin dute.
