Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

A-20: Gauerdian hasiko da hauteskunde-kanpaina


2011-11-03 06:48

Koalizio berriak (Amaiur, UPN-PP, Geroa Bai), Rajoy-Rubalcaba eta EAJ-Amaiur lehiak eta krisiaren kontrako neurriak izango dira ETAren erabaki historikoak markatutako hauteskundeetako protagonistak.

Azaroaren 20ko hauteskundeetarako atzeranzko kontaketa gauerdian jarriko da martxan, hauteskunde-kanpainaren hasiera ofizialarekin. Hauteskunde ezberdinak eta interesgarriak izango dira: ezberdinak, ETAk indarkeria behin betiko uztea erabaki duelako eta, ondorioz, atentaturik izango ez dela ziurra delako; eta interesgarriak, erabaki historiko horren ostean beste lehia politiko batzuek indarra hartuko dutelako.

Euskal Autonomia Erkidegoa

EAEn lehia hori EAJk eta Amaiurrek izango dute. EAk, Alternatibak, Aralarrek eta ezker abertzaleko independenteek osatutako koalizioak Kongresuan talde parlamentarioa izan dezake, inkesten arabera eta maiatzeko udal eta foru hauteskundeetan Bilduk erakutsi zuen indarra aintzat hartuta, baina EAJk berak baino ordezkari gehiago lortzeko gai izango ote den edo ez ikusteko dago.

Estatuan, PSOEk dena aurka duela ematen du, eta emaitza txarrak izango dituela iragartzen dituzte galdeketek; PP, berriz, gehiengo absolututik gertu egon daitekeela diote ikerketek. Estatuko boto banaketak EAEn eragin bera izango duen jakiteko dago, hau da, PSEren eta Euskadiko PPren arteko aldea hainbesterainokoa izango den ala ez.

Beste nobedade bat Ezker Batuak hauteskundeetan parte hartzeari uko egin diola da. Maiatzeko hauteskundeetan barne-krisi sakona piztu zen koalizio horren baitan eta ondorioak hauek izan dira: batetik, Mikel Aranak zuzendutako sektoreak Ezker Anitza izeneko hautagaitza sortu du eta IUrekin aurkeztuko da hauteskundeetara; bestetik, Javier Madrazoren sektoreak mantentzen ditu EB siglak eta bozetan parterik ez hartzea erabaki dute, IUri lehia ez egiteko.

Nafarroa

Nafarroan, hiru koalizio berri izango dira: UPN-PP, Amaiur eta Geroa Bai (EAJk eta Nafarroa Baiko independenteek osatutakoa).

1993. urtetik UPN eta PP elkarrekin aurkeztu dira, baina bi zuzendaritza nagusien arteko desadostasunak zirela eta, 2011ko maiatzeko udal eta foru hauteskundeetara banatuta joatea erabaki zuten. Alabaina, orain berriro elkartzea erabaki dute, besteak beste, Amaiurri aurre egiteko, Yolanda Barcinak berak aitortu duen moduan.

Nafarroan UPN lehen indarra izango dela gutxik jartzen dute auzitan,, baina azaroaren 20tik aurrera begirada guztiak Foru Gobernuan jarrita egongo dira; izan ere, UPN eta PSNren koalizio gobernuaren traje estua tenkatu egin du UPN-PP akordioak, eta sozialistak deseroso ageri dira euren gobernu kideekin, areago Yolanda Barcinak hauteskundeetara sozialisten arerio nagusiarekin eskutik helduta joatea erabaki duela kontuan hartuta.

Bestetik, Nafarroan boto abertzalea nola banatuko den jakiteak ere ikusmina piztu du. Joan den maiatzeko hauteskundeetatik hilabete batzuk baino ez dira igaro, baina aldaketa handiak izan dira. Aralarrek NaBai koalizioa utzi eta Amaiurrekin bat egitea erabaki du; eta NaBaiko independenteek eta EAJk Geroa Bai koalizioa sortu dute, Uxue Barkos buru dela.

Estatua

Estatuari dagokionez, inork ez du zalantzan jartzen Mariano Rajoy gailenduko dela. Gainera, inkesten arabera, PPk gehiengo absolutua lortuko luke eta PSOE porrotik handienaren atarian egon liteke.

Krisi ekonomikoari eta langabeziari aurre egiteko neurriak nagusituko dira bi hautagaien hitzaldietan. Aditu batzuen esanetan, ETAk armak utzi dituenez, Rajoyk eta Rubalcabak bakegintzaz eta normalizazio politikoaz eztabaidatzea saihestuko dute.

EAEn eta Nafarroan, ostera, ekonomia gaiak nabarmenduko diren arren, Euskal Herrian zabaldu den aro berriak ere oihartzun handia izango du eta biktimak, presoak edota autodeterminazio-eskubidea bezalako eztabaidagaiak hizpide izango dira.



Informazio gehiago:Eitb: A-20: Gauerdian hasiko da hauteskunde-kanpaina

52 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin