Puntako bertsolariak izango dira Udaberriko Bertsolari Jaialdiaren XX. edizioan, Santutxun

Azken hiru Txapelketetako irabazle Andoni Egaña bertan egongo da eta berarekin batera, ospe handiko bertsolari zaharrak eta gazte belaunaldikoak ere

2004-05-04 13:14:06

KAIXO.COM/
Aurten "Udaberriko Bertso Saioak" ekitaldiak, Bilboko Udaleko Kultura Sailak sustatzen duen udaberriko bertsolarien jaialdiak, XX. aldia beteko du, beste eszenatoki batean eta puntako bertsolariekin. Emanaldi guztiak Santutxuko Karmelo plazan izango dira, maiatzaren azken lau larunbatetan, 13:00etan hasita.

Aurreko 19 aldietan, jaialdia leku ezberdinetan egin da, esaterako, Areatzako kioskoan, Bidebarrietako liburutegian, Kafe Antzokian, Santiago Plazan edo Deustuko San Pedro plazan. Azken edizioetan, argi geratu da kale agerraldia izan behar duela, eguraldiak lagundu ez arren, ahozko literaturaren berezko esparrua horixe delako. Santutxu auzoa aukeratu da aurtengo jaialdia egiteko; hain zuzen ere, bertso eskola aitzindaria dago bertan. Jaialdia, egin-eginean ere, Santutxuko Bertso-Eskolaren proposamena izan zen eta Bilboko Udaleko Kultura Sailak proposamena jaso eta babestu egin zuen.

Bizkaiko hiriburuan, euskal kultura eta hizkuntza sustatzeaz gainera, "Udaberriko Bertso Saioak" ekitaldiak euskaltzaleentzako topagunea izan nahi du eta Uriko bertso eskolek egiten duten lana sustatu nahi du.

Kartela dela eta, nabarmentzekoa da azken bi hamarkadetako Euskal Herriko Txapelketetako irabazle guztiak bertan egongo direla, 1989an txapela irabazi zuen Jon Lopategi izan ezik: Andoni Egaña, egungo txapelduna eta 1993, 1997 eta 2001eko txapelduna; Sebastian Lizaso, 1986ko txapelduna, eta Xabier Amuriza, 1980 eta 1982ko txapelduna.

Orobat, aipatzekoa da azken Euskal Herriko txapelketako finalista batzuen presentzia, besteak beste, Sustrai Colina, Unai Iturriaga, Igor Elortza hiru bider Bizkaiko txapelduna edo Maialen Lujanbio aurtengo Gipuzkoako txapelduna, eta ez da emakumezko bakarra izango, Iratxe Ibarra eta Oihana Bartra bilbotarra ere hantxe egongo direlako.

Izan ere, tradizioz gizonezkoena izan den ariketan gero eta emakume gehiago ikusten ari gara.

Parte-hartzaileen zerrenda osatzeko, Xabier Silveira eta Amets Arzallus txapeldun nafarrak, Fredi Paia eta Arkaitz Estiballes bizkaitarra, Jexux M. Irazu gipuzkoarra, eta Joxe Agirre eta Gregorio Larrañaga "Mañukorta" beteranoak, oraindik plazan dabiltzan bertsolari dekanoen ordezkari legez.

"Udaberriko Bertso Saioak" ekitaldia maiatzean garatuko da lau larunbatetan, bata bestearen segidan, Karmelo plazan, 13:00etatik aurrera. Gaiak Santutxuko Bertso Eskolaren ardura izango dira, eta seguruenez hauexek izango dira parte-hartzaileen zerrenda eta eguna:

Maiatzaren 8a:
Andoni Egaña, Sebastián Lizaso, Sustrai Colina eta Unai Iturriaga

Maiatzaren 15a:
Fredi Paia, Joxe Agirre, Xabier Amuriza eta Xabier Silveira

Maiatzaren 22a:
Amets Arzallus, Igor Elortza, Jesús M. Irazu eta Maialen Lujanbio

Maiatzaren 29a:
Arkaitz Estiballes, Iratxe Ibarra, Gregorio Larrañaga "Mañukorta" eta Oihana Bartra.

Iruzkin berria

Registroa Erabiltzailea edo E-posta: Pasahitza: Foroetan sarrera bat ipintzeko lehenengo erregistratu behar zara

Mezua Lege oharra onartzen dut

0 iruzkin aurkitu dira 0-tik 0-ra erakusten.    

   

-----------------------
dir.eccion.es- zabaldu- aupatu- bildu- meneame- del.icio.us
Berria lagun bati bidali