Gipuzkoako Ficoba mendiaren erakusleiho bilakatuko da urriaren 22tik 24ra

Mendizale eta eskalatzaile ezagunak hurbilduko dira Gipuzkoako Erakustazokara beren azken espedizioen eta abenturen inguruko hitzaldiak ematera eta proiekzioak aurkeztera
2004-04-01 10:18:21

Urriaren 22tik 24ra, Gipuzkoako Erakustazoka Ficobak Mendiexpo erakustaldia hartuko du, urteko hitzordu nagusia Pirinioen bi aldeetako mendizaleentzat. Jende guztiarentzat den erakustaldi hau klubek eta federazioek bultzata jaio da, mendiarekin zerikusia duten sektore guztien tokia beren produktuak eta zerbitzuak erakusteko eta, aldi berean, jai handia mendia maite dutenentzat.

Mendiexpo Mendiko mugaz bestaldeko erakustaldia hiru jarduera-multzotan eratu da. Alde batetik, sektoreko enpresek, besteak beste, banatzaileek txikizkakoek, elkarteek, turismo agentziek eta instituzioek mendiko kirolarekin eta aisiarekin zerikusia duten beren produktuak eta zerbitzuak erakutsiko dituzte.

Bestetik, Mendiexpok, mendia maite dutenentzat jai bihurtzeko helburua duelarik, arreta berezia eskaini dio erakustaldiaren atal ludikoari. Horrela, erakustaldira joaten direnek jarduera paralelo ugarietan parte hartzeko aukera izango dute; besteak beste, rokodromoan, demodromoan, erakusketetan, hala nola, Josune Bereziarturen argazki-erakusketan, produktu eta moda-desfileetan, eremu nagusian, txapelketetan edo tailerretan.

Azkenik, eta Ficobak antolatzen dituen erakustaldietan ohiko denez, arreta berezia eskainiko zaie jardunaldi teknikoei. Oraingo honetan, mendizale eta eskalatzaile ospetsuak hurbilduko dira Gipuzkoako Erakustazokara beren azken espedizioen eta abenturen inguruko hitzaldiak ematera eta proiekzioak aurkeztera; hala nola, Iñaki Ochoa de Olza, Christian Ravier edo Mikel Zabalza. Aldi berean, jardunaldiak izango dira mendiarekin zerikusia duten gai praktikoei buruz, sorospena eta lokalizatzea, besteak beste.

Azken buruan, Mendiexpok aukera emango dio bisitariari mendizaletasunarekin zerikusia duten gaiei buruz informatzeko, sektoreko azken berrikuntzak ikusteko eta beste zaletu batzuekin esperientziak elkartrukatzeko.

Hamaika sektore

Mendiexpon honako erakusketari hauek egongo dira: natura eta ekologiako sektoreak (elkarteak, ekologistak, naturistak...); ostatuak (landetxeak, aterpeak,...); sorospena, salbamendua eta kiroletako medizina; kiroletako materiala; akanpadako materiala; kirol-jantziak, argitaletxe adituak; mapak eta planoak; abenturako bidai agentziak; eski-estazioak, turismo bulegoak; federazioak; elikadura espezializatua; kosmetika espezializatua; eskolak eta prestakuntza; ibilgailuak; orientazioa; doitasun eta komunikazio tresnak (GPS) eta mantenu-materiala.

Mendiexpok ez du hutsik egingo eta erantzuna emango die mendi-kiroletan zaletu ugariren gustu eta kezkei eta, bertan, informazioa aurkitu ahal izango dute hainbat kiroli buruz: alpinismoa, BTT, eski alpinoa, iraupen-eskia, zeharkaldi-eskia, elur-erraketak, snow board, telemark, kirol-eskalada, eskalada klasikoa, izotz-eskalada, bulder, espeleologia, trokarte-jaistea, trekkinga, ur biziak (raftinga, piragua, kayaka, hidrospeed...) eta aire-kirolak (delta-hegoa, parapentea, motorrik gabeko hegaldia...).

Pirinioen bi aldeetako herrialdeetan dagoen mendizaletasunak bermatuta jaio da Mendiexpo. Euskadin 24.000 federazio-lizentzia daude eta 60.000 asteburuetan mendiko aisia praktikatzen dutenak, Mendiko Euskal Federakuntzaren datuen arabera.


Erakustaldiaren agertokia

Mendiexpo Ficaban izango da, Irunen dagoen Gipuzkoako Erakustazokan. Ficobak abangoardiako azpiegitura dauka, eta erakusketako eta telekomunikazioetako ekipamendu modernoenak ere bai. 70.000 m2-ko azaleran kokatua, zerbitzu orokorren eremua, erakusketako hiru pabiloi 5.000 m2-koak, erakustaldietarako bereziki prestatutako 7.500 m2 atari zabalean eta lurrazpiko 340 plaza dituen parkinga.

Prentsa Aretoa, 6 bulego pribatu erakusketariek erabil ditzaten eta ?VIP Klub? bat daude eraikin nagusian. Gainera, askotariko hiru bilera-gela daude 100, 45 eta 30 lagunentzako lekua dutenak, hurrenez hurren. Eraikin honek badu, baita ere, 392 lagunentzako Auditorium bat, megafonia eta aldibereko itzulpenerako hiru kabina dituena. Leku honek, duen askotariko diseinuagatik, erakustaldiei zerbitzu osagarria eskaintzeaz gainera, aukera ematen du kultur jardunak, hitzaldiak eta ekitaldiak egiteko.

Iruzkin berria

Registroa Erabiltzailea edo E-posta: Pasahitza: Foroetan sarrera bat ipintzeko lehenengo erregistratu behar zara

Mezua Lege oharra onartzen dut

0 iruzkin aurkitu dira 0-tik 0-ra erakusten.    

   

-----------------------
dir.eccion.es- zabaldu- aupatu- bildu- meneame- del.icio.us
Berria lagun bati bidali