BILBO, 28 (EUROPA PRESS)

Ertzaintzak bost gazte atxilotu ditu gaur goizaldean Getxon, lesio delitu bat egitea egotzita. Zor ekonomiko batengatik liskarrean hasi ziren auzipetuak, eta gazteetako bi arma zuriz zauritu zituzten, Eusko Jaurlaritzako Herrizaingo Saileko iturriek gaur jakinarazi dutenez.

Gertaerak gaur goizaldeko 1,00 aldera izan dira, Getxon. Ordu horretan, Gobelako geltokira joateko abisua jaso du Ertzaintzak; izan ere, hainbat gazte borrokan zeuden eta haitako batzuek laguntza medikoa behar zuten, zaurituta zeudelako.

Agenteak bertaratu direnean, bi gazterekin egin dute berba; batek odol-zauriak zituen aurpegian eta anbulantzia bat eskatu dute ospitalera eramateko. Bi gazte horiek esan dutenez, arma zuriz egindako eraso baten biktimak izan dira eta erasotzaileak inguruetan zeuden beste hiru gazte izan dira.

Jarraian, ertzainak ustezko hiru erasotzaileengana joan dira, eta haietako batek esku batean arma zuriz egindako zauriak zituela ikusi dute. Gertatutakoari buruz galdetu diete agenteek, eta, bertsio kontraesankorren aurrean, Ertzaintzak bost gazteak atxilotu ditu lesio delitua egotzita, gertaeraren jatorria eta egileak jakiteko xedez. Hiru lagun (16, 19 eta 20 urtekoak) Santurtzin bizi dira, eta beste biak (16 urtekoak), Portugaleten.

Ertzaintzak geroago egindako ikerketek zehaztu dutenez, zor ekonomiko batengatik hasi ziren liskarrean bost gazteak, eta bi arma zuriz zauritu zituzten. Erasoan labanak eta beste mota batzuetako arma zuriak erabili zirela jakin ondoren, agenteek borroka izan den ingurua miatu dute. Areetako Kaia kalean sukaldeko labana bat aurkitu dute eta, geroago, Bola hondartzako aldapan, tximeleta-erako labana bat. Antza, borrokan erabili dituzte bi arma horiek.