BILBO, 17 (EUROPA PRESS)

Mundu mailan hizkuntza gaietarako azoka nagusiena den 'Expolangues' izenekoa Parisen urtarrilaren 18tik 21ra arte egingo da, 20 herrialde eta 60 hizkuntzatik gora ordezkatuak izango direlarik eta euskara bertan izango da ordezkatua Eusko Jaurlaritzak jarriko duen stand bati esker.

Eusko Jaurlaritzako Kultura Sailak igorritako komunikatu baten arabaera, hizkuntza, kultura eta kultur harremanei buruzko erakusketa da Parisko hau. Stand-ean harreragile, Parisko Euskal Etxeko kideak ibiliko dira, hurbiltzen den jendea atendituz eta informazioa emanez.

"Munduko hizkuntzak. Hizkuntzen mundua" izenburupean erakustazoka honen XXIV. edizioa urtarrilaren 18tik 21ra bitarte burutuko da, Alemania ohorezko gonbidatu dela. Gainera, aurtengoa 21. urtea da Eusko Jaurlaritza 'Expolangues'era bertaratzen dela; hau da, azoka sortu eta hirugarrenerako euskara bertan zen eta horrela izan da urtero, harrezkero.

"Ezin ahantzi erakustazoka hau mundu mailan bere alorreko erakusketa garrantzitsuena dela, 20.000 bisitari baino gehiago bertaratuko dira, horietatik erdia baino gehiago hizkuntza alorretako profesionalak. Erakusleak, aldiz, 200 inguru izango dira eta 20 herrialde eta 60 hizkuntzatik goiti egongo dira ordezkatuak", azaltzen dute euskara Parisen ordezkatu duten bozeramaileek.

Bertan parte hartuko dutenen artean aipa litezke gobernuak, enbaxadak, argitaletxeak, eskolak, unibertsitateak, multimedia enpresak, itzulpengintza alorreko espezialistak, hizkuntzen irakaskuntza eta etengabeko prestakuntzetako adituak, turismo bulegoak eta beste asko.

Milaka lagun pasatzen dira baita urtero Parisen egiten den erakusketa honetatik. Bisitari anitzen artean, ikasleak, irakasleak, enpresetako prestakuntza arduradunak, itzultzaileak, ikerlariak eta oro har hizkuntzen inguruan interesa duen jendea dago. Iazkoan, adibidez, 21.735 bisitari izan zituen, horietatik 11.354 hizkuntzen alorretako profesionalak, eta 10.381 publikoa zelarik.

AZOKAKO EUSKAL EDUKIAK

Aurtengo 'Expolangues' azokan (Paris Expo, Hall 7.1, Porte de Versailles), Hitzaldietan eta Hizkuntzen Kioskoa izeneko gelan, euskarazko eskola bat emango dute Parisko Euskal Etxeko irakasleek. Hitzordua asteazkenean izango da, 12,00etatik 14,00etara.

Azokan zehar, euskararen stand-era hurbilduko diren lagunek euskararekin zerikusia duen edozein gairi buruz galdetzeko eta nahi adina informazioa lortzeko aukera izango dute, bertan izango dituztelarik erakusgai euskara ikasteko ikas-materialak eta sistemak, hiztegiak, euskararen inguruko informazioa, ikerketa linguistiko eta soziolinguistikoak, multimediak, euskaratik beste hizkuntzetara itzulitako eta beste hizkuntzetatik geurera itzulitako lan literarioak.

Baita ere aurkituko dira literatura liburuak, haur eta gazteentzako aldizkariak, euskarazko aldizkari eta egunkariak, metodoei buruzko informazioa, helbideak, folleto desberdinak, bideoak...eta Internet sarea bitarteko informazioa (www.habe.org , www.euskadi.net/euskara eta beste) eta euskara autoikaskuntza bidez ikasteko sareko programak.