Última hora Economía Deportes Cultura Sociedad

Azken ordua Ekonomia Kirolak Kultura Gizartea

EUSKADI.-Gizon batek bere bahiketa simulatu du Gasteizen, etxetik kanpo egon eta dirua xahutu izana estaltzeko

2008-01-08 11:22
GASTEIZ, 8 (EUROPA PRESS)

Ertzaintzak bahitu duten itxurak egitea eta salaketa faltsua jartzea egotzi dio JM.S.E. 32 urteko gizonezkoari. Bahitu egin zutela salatu zuen Ertzaintzaren egoitza batean, etxetik kanpo egon eta dirua xahutu izana estaltzeko.

Eusko Jaurlaritzako Herrizaingo Sailak gaur jakinarazi duenez, joan den ostiralean, hilak 4, gauean, gizonezko bat Ertzaintzak Gasteizen duen egoitza batean joan zen eta salaketa jarri zuen, bezpera arratsaldean bahitu egin zutela esanda.

Haren hitzetan, ibilgailu batean zihoazen hainbat lagun berarengana hurreratu ziren Tomas de Zumarraga Dohatsuaren eta Domingo Beltrán kaleek bat egiten duten tokian, eta, pistola batekin mehatxatuz, automobilaren barrura sartzera behartu zuten.

Jarraian, belaunikatzeko agindu eta burua estali zioten, gero eraikin batera eraman eta gela batean sartzeko. Bahitzaileetako batek bere dirua (40.000 euro) emateko agindu zion, behin baino gehiagotan, eta arma zuri batekin sastatu zuen. Halaber, diru zorroa hartu eta barruan zituen 880 euroak kendu zizkioten.

Hurrengo egunean (ostirala), 16,00ak aldera, Mendizabala inguruan askatu zuten eta Txagorritxuko Ospitalera joan zen, arma zuriaz egindako hainbat zauri baitzituen gorputz osoan.

Kasu horren ardura hartu zuten ertzainek, orduan, ikerketa hasi zuten, gertatutakoa argitu eta ustezko bahitzaileak aurkitzeko. Hala ere, hainbat datuk salaketaren egiazkotasuna zalantzan jartzera bultzatu zituzten ertzainak. Ondorioz, salaketaren egileak, harrapatuko zutela ikustean, hilaren 3tik 4rako gauean makinetan jokatzen eta alkoholdun edariak hartzen egon zela aitortu zuen, igande arratsaldean.

Antza denez, arratsaldeko lehen orduan etxerantz joan zen eta, atarian, bere burua labana txiki batekin zauritu eta poliziari deitu zion. Ustez, etxetik kanpo egon eta dirua xahutu izana familiaren aurrean azaltzeko egin zituen bahitu zuten itxurak. Deklarazio horren aurrean, ertzainek argiketa abiatu zuten eta delitu simulazioa eta salaketa faltsua egitea leporatu zioten.