Última hora Economía Deportes Cultura Sociedad

Azken ordua Ekonomia Kirolak Kultura Gizartea

EUSKADI.-Deustuko Unibertsitateko S3Lab Segurtasuneko Laborategiak Avanza Planaren aintzatespena jaso du

2007-12-19 11:52
BILBO, 19 (EUROPA PRESS)

Deustuko Fundazio Teknologikoko laborategiak eta Deustuko Unibertsitateko Pablo García Bringas eta Joseba Peña Landaburu irakasleek zuzendutako S3Lab laborategiak (Laboratory for Smartness, Self knowledge and Security) Jakintza eta Edukien Zentroaren onespena jaso du Telekomunikazioko eta Informazioaren Gizarterako Estatu Idazkaritzak -Espainiako Industria, Turismo eta Merkataritza Ministerioa- antolatu duen Avanza Planaren barruan.

Horrela, Informazioaren Gizartearen garapenerako erreferentzia zentro gisa S3Lab-en hazkundea eta sustapena bultzatzeko balioko duten proiektuak eta ekimenak sustatzeko, Avanza Planak milioi bat euroko aurrekontua zuzendu du (200.000 euro diru-laguntza gisa eta 800.000 euro berreskuratzeko mailegutan) ikerketa taldea sendotzeko. Era horretara, giza kapitalez eta ekipamenduz hornituko da, Informazioaren Segurtasunaren arloko ikerketan bikaintasuna erakartzea goiburua izanik.

Deustuko Unibertsitateko iturrien arabera, Interneten presentzia gaur eguneko bizitzan areagotzea eta berriki agertu diren Mugikortasun eta Haririk gabeko Informatika kontzeptuek zabaldu egin dute Informazioaren Segurtasunaren beharra. Orain arte, elkarte informatikoaren eta administrazioaren ahalegina babeserako tresnak sustatzera eta garatzera emana egon da (batez ere, antibirusak eta suebakiak), eta alde batera utzi dira funtsezko arloak, informazio sistemen segurtasun globala, datuen babesa eta komunikazioko azpiegiturak eta informatikako delituen kontrako borroka.

Estatu mailan, Informazioaren Segurtasun arloak punta-puntako enpresa kopuru nabarmena du, batzuk erreferente direnak mundu mailan, baina ez dago enpresa horiek sortutako etekinak hartu eta zabalduko dituen ikerketarako azpiegiturarik.

Dinamika hori apurtu nahian, Deustuko Unibertsitateko ikerketa taldeak lehen aipatutako segurtasunaren sektoreko erreferente diren enpresarik gehienekin lan egin du eta egiten dihardu, eta I+G+Bko proiektu kopuru aipagarria burutu du arrakastaz 1999tik, antzinako 300 milioi pezeta baino gehiagoko munta izan dutelarik.

Hala ere, etorkizunari begiratu nahirik eta lan horri jarraipena eman nahirik, S3Lab-ek etengabeko konpromisoa mantentzen du Informazioaren Segurtasuneko alderdi desberdinetan ari diren talentuak sustatzen eta erakartzen. Orain, lan horrek guztiak bere onespena lortu du Avanza Planaren bitartez.