Última hora Economía Deportes Cultura Sociedad

Azken ordua Ekonomia Kirolak Kultura Gizartea

EUSKADI.-Elhuyar Oinarrizko Hiztegiaren bigarren argitalpena kalean da

2007-11-29 17:01
BILBO, 29 (EUROPA PRESS)

Elhuyar Oinarrizko Hiztegiaren bigarren argitalpena kalean dago jada, eta Elhuyar Hiztegiaren on line bertsioa ere kontsultatzeko moduan. Horrenbestez, erabiltzaileen beharrak kontuan hartuz, Elhuyar Fundazioak euskara-gaztelania/castellano-vasco familiako hiztegi guztiak eguneratuta eta formatu guztietan jarri ditu eskuragarri, eta aurten, Durangoko Azokan, Elhuyarren standera gerturatzen den orok hiztegia sakelako telefonora deskargatzeko aukera izango du.

Elhuyar Oinarrizko Hiztegiak 36.000 sarrera, 48.000 adiera eta 3.500 adibide jasotzen ditu, eta Elkar argitaletxeak eta Elhuyar Fundazioak elkarlanean argitaratu dute. Hiztegi hau euskara-gaztelania/castellano-vasco gamako txikiena da, poltsikoko hiztegi gisa sailka daiteke.

Bestalde, Elhuyar Hiztegiaren -familiako hiztegi handiena- on line bertsioa ere kontsultatzeko moduan dago jada www.elhuyar.org/hiztegia webgunean. Horrenbestez, Elhuyar Fundazioak euskara-gaztelania/castellano-vasco gamako hiztegi guztiak eguneratuak aurkezten ditu: ekainean, Elhuyar Hiztegi Txikiaren hirugarren argitalpena kaleratu zuen, eta 2006ko azaroan, Elhuyar Hiztegiaren hirugarrena. Azken argitalpen horiekin, Elhuyar Fundazioak erabiltzaileen beharrak hartu ditu kontuan, eta horietara egokitu nahi izan du.

Elhuyar Fundazioaren helburuetako bat da euskara garatzeko eta normalizatzeko hizkuntza-baliabide, tresna eta zerbitzuak sortzea eta eskaintzea. Helburu horri tinko eutsiz, urteak daramatza hiztegigintzan lan egiten, eta hiztegi-sorta gero eta handiagoa osatzen.

Elhuyar Fundazioak plazaratzen dituen hiztegi guztien koherentziari eustearren, datu-base bat sortu zuen duela urte batzuk, argitaratzen dituen hiztegi guztiek datu-base bera izan dezaten oinarri.

Elhuyar Fundazioak hiztegi elebakarrak, elebidunak eta teknikoak argitaratu ditu orain arte, zenbait formatutan (liburua, CD-ROMa eta Internet), besteak beste, Elhuyar dictionary/hiztegia, Dictionnaire Elhuyar Hiztegia, Euskal Hiztegi Modernoa, Ikaslearen Hiztegia, Elhuyar Sinonimoen Kutxa edo Energiaren Hiztegi Entziklopedikoa.