Última hora Economía Deportes Cultura Sociedad

Azken ordua Ekonomia Kirolak Kultura Gizartea

EUSKADI.-"Elhuyar Hiztegi Txikia"-ren hirugarren argitalpena kalean da

2007-06-29 12:21
BILBO, 29 (EUROPA PRESS)

Elhuyar Fundazioak "Elhuyar Hiztegi Txikia" delakoren (euskara-gaztelania/castellano-vasco) hirugarren argitalpena kaleratu berri du. Argitalpen berrituak 42.000 sarrera, 9.000 azpisarrera, 71.000 adiera eta 18.900 adibide ditu, eta bi ataletan banatuta dago: euskara-gaztelania eta gaztelania-euskara. Gramatika eranskin bat ere badu hiztegiak.

"Elhuyar Hiztegi Txikia"-ren lehenengo argitalpena duela bederatzi urte plazaratu zuen Elhuyarrek. Harrezkeroztik, etengabeko eguneratze-lanak egin dira. Bigarren argitalpena 2001ean egin zen, eta, orain, sei urte geroago, hirugarren argitalpena kaleratu da, osatua eta berritua.

Hiztegi hau berritzeko, zenbait iturri erabili dira: 2006ko azaroan argitaratutako "Elhuyar Hiztegia", Euskaltzaindiaren "Hiztegi Batua"-ren azken emaitzak, orain arte argitaratu diren gainerako hiztegiak, egindako terminologia-lanak edo estilo-liburuak, euskararen hizkuntza-ereduari buruz izan diren eztabaidak edota kontsulta-corpusak.

Elhuyar Fundazioko aditu-talde bat aritu da "Elhuyar Hiztegi Txikia"-ren erredakzio-lanetan. Argitalpen berri honen zuzendariak, berriz, Miren Azkarate (euskaltzaina), Xabier Kintana (euskaltzaina) eta Xabier Mendiguren Bereziartu (euskaltzain urgazlea) izan dira.

Elhuyar Fundazioaren helburuetako bat euskara garatzeko eta normalizatzeko hizkuntza-baliabide, tresna eta zerbitzuak sortzea eta eskaintzea da. Helburu horri tinko eutsiz, urteak daramatza hiztegigintzan lan egiten eta hiztegi-sorta geroz eta handiagoa osatzen.

Elhuyar Fundazioak plazaratzen dituen hiztegi guztien koherentziari eustearren, datu-base bat sortu zuen duela urte batzuk. Argitaratzen diren hiztegi guztiek datu-base bera dute oinarri. Elhuyar Fundazioak hiztegi elebakarrak, elebidunak eta teknikoak argitaratu ditu orain arte; besteak beste, "Elhuyar Hiztegia", "Dictionnaire Elhuyar hiztegia", "Euskal hiztegi modernoa", "Ikaslearen hiztegia", "Elhuyar sinonimoen kutxa", "Energiaren hiztegi entziklopedikoa" edo "Geologia hiztegia", zenbait formatutan (liburua, CD-ROMa eta Internet).